ഹൃദയത്തിലേക്കുള്ള വഴികള്‍....

അന്നൊരു നിലവിളി പോലെയാണ് ഞാനെന്റെ

ഹൃദയത്തിന്റെ ശബ്ദം കേട്ടത്

പടയോട്ടത്തിനിടയില്‍ വേര്‍പ്പെട്ടു പോയ ഹൃദയം

എന്നോട് വഴി ചോദിച്ചു

മങ്ങിക്കൊണ്ടിരിക്കുന്ന എന്റെ ഓര്‍മകളില്‍ എനിക്കു വ്യക്തമായില്ല,

ചോദിച്ചത് എന്നിലേക്കുള്ള ദൂരമോ, നിന്നിലേക്കുള്ള ദൂരമോ?

ഞാനത് മറന്നു.... ഞാന്‍ യാത്രയിലാണ്.

ഹൃദയം വീണ്ടും വിളിച്ചു....

ഇരുട്ടിന്റെ മൂലകളില്‍ ഞെരിഞ്ഞമര്‍ന്ന ആ പെണ്‍കുട്ടിയുടെ

ദീനരോദനത്തില്‍

കാതടപ്പിക്കുന്ന അട്ടഹാസങ്ങളുടെ വേദനയില്‍

എനിക്കതും കേള്‍ക്കാനായില്ല

ഞാനതും മറന്നു.... ഞാന്‍ യാത്രയിലാണ്.

എന്റെ യാത്രകളുടെ പാളങ്ങള്‍ തെറ്റി...

പട്ടിണി ചൂളം വിളിച്ചു വന്നു...

ഒറ്റക്കൈ കഴുത്തില്‍ മുറുക്കി...

ഹൃദയം അടുത്തു വന്നു...

'ഞാന്‍ ചോദിച്ചത് നിന്നിലേക്കുള്ള ദൂരം തന്നെയായിരുന്നു'

ഞാന്‍ ഞെട്ടിയുണര്‍ന്നു

ഈ യാത്രകളവസാനിപ്പിച്ച് എനിക്കു തിരിച്ചു പോകേണ്ട...