ഡിസംബര്‍ 3 ലോക വികലാംഗ ദിനം

ഡിസംബര്‍ മൂന്ന് ലോക വികലാംഗ ദിനമായി ആചരിക്കുന്നു. 1992 ഒക്ടോബറിലാണ് ഐക്യരാഷ്ട്ര സഭ ഈ ദിനം വികലാംഗരുടെ ദിനമായി പ്രഖ്യാപിച്ചത്. ദേശീയ, അന്തര്‍ദേശീയ തലങ്ങളില്‍ വികലാംഗരുടെ അവകാശങ്ങളെ കുറിച്ച് ബോധവത്കരണം നടത്തുന്നതിനാണ് ഈ ദിനം സമര്‍പ്പിക്കപ്പെര്‍ട്ടിരിക്കുന്നത്.
1982 ഡിസംബര്‍ മൂന്നിനാണ് വികലാംഗര്‍ക്ക് വേണ്ടിയുള്ള ആഗോള പദ്ധതി സംബന്ധിച്ച് ഐക്യരാഷ്ട്ര പൊതു സഭ തീരുമാനമെടുത്തത്. സാമൂഹ്യ ജീവിതത്തില്‍ വികലാംഗരുടെ സജീവ പങ്കാളിത്തം ഉണ്ടാവണമെന്ന് ഐക്യരാഷ്ട്ര സഭ തീരുമാനമെടുത്തത്തിന് പുറമെ അംഗ രാജ്യങ്ങളും വികലംഗരുടെ ക്ഷേമ പ്രവര്‍ത്തനങ്ങള്‍ നടത്തണമെന്ന് ആഹ്വാനം ചെയ്യുകയും ചെയ്തു.


പ്രഖ്യാപനങ്ങള്‍ കഴിഞ്ഞ് വര്‍ഷം പലത് കഴിഞ്ഞിട്ടും വികലാംഗരുടെ പ്രശ്നങ്ങള്‍ പലതും ഇപ്പോഴും പരിഹരിക്കപ്പെടാതെ കിടക്കുന്നുണ്ട്.അന്താരാഷ്ട്ര കാര്യങ്ങളില്‍ വികലാംഗരെ സഹകരിപ്പിക്കുന്നില്ല.മിക്ക രാജ്യങ്ങളിലും അവരെ മുഖ്യധാരാ ജീവിതത്തില്‍ നിന്ന് മാറ്റി നിര്‍ത്തിയിരിക്കുകയാണ്.വികലാംഗരുടെ ക്ഷേമത്തിനായി നിയമം പാസാക്കിയ രാജ്യങ്ങളില്‍ പോലും അവരുടെ സഥിതി മെച്ചമല്ല. വിദഗ്ദ്ധമായ ആശയങ്ങള്‍ നടപ്പിലാക്കുന്നതിലുള്ള വീഴ്ച മൂലമാണ് ഇത് സംഭവിക്കുന്നത്.ലോകമെമ്പാടുമായി 600 ദശലക്ഷത്തിലധികം വികലാംഗരുണ്ടെന്നാണ് കണക്കാക്കപ്പെടുന്നത്. ഇത് ലോക ജനസംഖ്യയുടെ പത്ത് ശതമാനത്തിലധികം വരും.വികലംഗരില്‍ 80 ശതമാനം പേരും വികസ്വര രാജ്യങ്ങളില്‍ ആണ് കഴിയുന്നതെന്ന് കണക്കുകള്‍ സൂചിപ്പിക്കുന്നു.


വികലാംഗത്വം ഒരു സമൂഹ്യ പ്രശ്നമായാണ് കണക്കാക്കപ്പെടുന്നത്.ഇവര്‍ക്കായി ‘ഡിസേബിള്‍ഡ് പീപ്പിള്‍സ് ഇന്‍റെര്‍നാഷണല്‍’ എന്ന സംഘടന പ്രവര്‍ത്തിക്കുന്നുണ്ട്.വികലാംഗരുടെ പ്രശ്നങ്ങള്‍ സങ്കീര്‍ണ്ണമാണ്. സമൂഹങ്ങളുടെ,സംസ്കാരങ്ങളുടെ പശ്ചാത്തലത്തില്‍ നിന്ന് നോക്കുമ്പോള്‍ മാത്രമേ അതേ കുറിച്ച് കൂടുതല്‍ മനസിലാക്കാനാകൂ.വികലാംഗരുടെ ക്ഷേമത്തിനായി പ്രവര്‍ത്തിക്കുന്ന ‘ഹാന്‍ഡിക്യാപ് ഇന്‍റെര്‍നാഷണല്‍’ വികലാംഗര്‍ക്ക് വൈദ്യസഹായം എത്തിക്കുന്നതിലുപരി അവരുടെ അവകാശങ്ങള്‍ സംരക്ഷിക്കുന്നതിനുള്ള പ്രസ്ഥാനമായി മാറിക്കഴിഞ്ഞു. പ്രാദേശിക,ദേശീയ, അന്തര്‍ദേശീയ തലങ്ങളില്‍ ഈ സംഘടന പ്രവര്‍ത്തിക്കുന്നുണ്ട്.ലോകമെമ്പാടുമുളള വികലാംഗരുടെ ക്ഷേമത്തിനും അവരുടെ അവകാശങ്ങള്‍ സംരക്ഷിക്കുകയുമാണ് സംഘടനയുടെ ലക്‍ഷ്യം.

ബലി പെരുന്നാള്‍ ആശംസകള്‍.


ഉന്നതമായ ഒരാദര്‍ശത്തെ ഹൃദയത്തിലേറ്റിയ ഇബ്രാഹീം നബിയുടെയും സ്വയം സന്നദ്ധതയുടെ മാതൃകാ പുത്രനായി മാറിയ ഇസ്മാഈല്‍ നബിയുടെയും ത്യാഗസ്മരണയാണ് ബലി പെരുന്നാള്‍

ഏകദൈവ വിശ്വാസത്തിനു വേണ്ടി ആത്മാവ് സമര്‍പ്പിച്ചവനായിരുന്നു ഇബ്രാഹീം നബി. വിശ്വാസം എന്നത് ഒരു മൂലയില്‍ ചടഞ്ഞുകൂടി ജപിക്കാനുള്ളതല്ലെന്നും മറിച്ച് ജീവിതത്തില്‍ വഴിവിളക്കായും വീഴ്ചകളിലെ തിരുത്തായും ഉപയോഗിക്കപ്പെടേണ്ടതാണെന്നുമാണ് ആ മഹത്തായ ജീവിതം പഠിപ്പിക്കുന്നത്.

പുതിയ പ്രതീക്ഷകളെയും പുതിയ പുലരികളെയുമാണ് ഈദ് നമ്മുടെ മുമ്പില്‍ വരച്ചു കാട്ടുന്നത്.ഈദ് ഐക്യത്തിന്റെ വേദിയാകുന്നു.പരസ്പരം സ്നേഹവും സൌഹാര്‍ദ്ദവുമാണ് ഈദ് വിളംബരം ചെയ്യുന്നത്.

നോവുന്ന ഹൃദയത്തെ സമാശ്വസിപ്പിക്കാനും കരയുന്നവന്റെ കണ്ണീരൊപ്പുവാനും കഴിയാത്തവനു വിശ്വാസിയാകുവാന്‍ കഴിയുകയില്ല.കരഞ്ഞു കലങ്ങിയ കണ്ണീരുമയി ഈദ് ദിനം കൊണ്ടാടുന്ന ചിലരെങ്കിലും നമ്മോടൊപ്പം ഇന്നുമുണ്ട്. ഒരിറ്റ് കുടിനീരിനായ് കൂടുവിട്ടിറങ്ങിയവരും, ഒരു ചാണ്‍ വയറിനായ് ചേറു പുരണ്ട് നടക്കുന്നവരുമുണ്ട്. ഈദ് സുദിനത്തില്‍ പ്രിയതമനില്ലാതത്തതിന്റെ പേരില്‍ വ്യസനിക്കുന്നവര്‍, നൊന്തു പ്രസവിച്ച മകനോടൊപ്പം ഈദ് നെയ്ച്ചോര്‍ കഴിക്കാന്‍ ഭാഗ്യമില്ലാതെ പോയ ഉമ്മമാര്‍, ഉറ്റ ചങ്ങാതിയുടെ വേര്‍പാടില്‍ ദുഖിക്കേണ്ടി വന്ന ഒത്തിരി പേര്‍, അധിനിവേശങ്ങളുടെ ഇരകളായി ലോകത്തിന്റെ നാനാഭാഗങ്ങളില്‍ വേദന തിന്ന് കഴിയുന്നവര്‍, നാളെയെക്കുറിച്ച് പ്രതീക്ഷകളില്ലാതെ നഷ്ട സ്വപ്നങ്ങളുമായി ജീവിതം തള്ളിനീക്കുന്നവര്‍, നാം ഇനിയും കണ്ടിട്ടില്ലാത്ത ദൈന്യതയുടെ വിളര്‍ത്ത മുഖങ്ങള്‍ ഈ സുദിനത്തില്‍ നമ്മോടൊപ്പമുണ്ടെന്ന് ഓര്‍ക്കുക നാം.

ഇബ്രാഹീം നബിയുടെ ജീവിതം വീണ്ടും അനുസ്മരിക്കുന്ന ഈ ബലിപെരുന്നാളില്‍ ഇബ്രാഹീമുമാരായി തീരാനുള്ള ഇച്ഛാശക്തിയാണ് നാം കാണിക്കേണ്ടത്.ദുരാചാരങ്ങള്‍ക്കും അനാചാരങ്ങള്‍ക്കുമെതിരെ പടയണി ചേരുക നാം.

അല്ലാഹു അക്ബര്‍, വലില്ലാഹില്‍ ഹംദ്....